Kontinenti duhet të krijojë të ardhmen e tij dhe e vetmja mënyrë për ta bërë këtë është duke punuar së bashku si anëtarë demokratë të familjes evropiane.
Ndërsa Rusia nisi pushtimin e saj brutal të Ukrainës më 24 shkurt, Evropa u zgjua papritur duke kuptuar se paqja në kontinent nuk është e garantuar. Kjo luftë e paprecedentë dhe e pajustifikuar është një sulm ndaj rendit juridik ndërkombëtar dhe si e tillë, ajo përbën një kërcënim për lirinë dhe sigurinë tonë.
Me këtë luftë, presidenti rus Vladimir Putin shpresonte të mbillte ndarje mes vendeve të Evropës, por në fakt, arriti të kundërtën. Ne qëndrojmë të bashkuar – jo vetëm anëtarët e Bashkimit Evropian, por të gjitha vendet evropiane.
Ne do të bëjmë gjithçka në fuqinë tonë për të ndihmuar Ukrainën të rifitojë sovranitetin dhe integritetin e saj të plotë territorial dhe do të mbështesim rindërtimin e saj. Por fakti është se agresioni i paprovokuar i Rusisë gjithashtu na detyron të gjithëve të rimendojmë disa baza rreth këtij kontinenti që të gjithë ndajmë, dhe se si të mbrojmë më së miri demokracinë dhe vlerat tona të përbashkëta. Nevoja për një përgjigje të fortë, të vazhdueshme dhe të bashkuar evropiane është e vetëkuptueshme.
Kjo është arsyeja pse ne mbështesim plotësisht propozimin e presidentit francez Emmanuel Macron për një Komunitet Politik Evropian (EPC).
EPC duhet të jetë një vend ku të gjitha vendet demokratike evropiane mund të diskutojnë shqetësimet dhe sfidat e përbashkëta dhe të gjejnë zgjidhje. Ajo nuk duhet të drejtohet nga burokracia, por nga fleksibiliteti. Ajo nuk duhet të udhëhiqet nga agjenda fikse, por nga prioritetet që na shqetësojnë të gjithëve – duke përfshirë luftën në Ukrainë, varësinë energjetike dhe sigurinë ushqimore.
Ne kemi nevojë për një platformë që të mos mbivendoset me organizatat e forta rajonale që kemi tashmë në Evropë ose të zëvendësojë procesin e mirëstrukturuar të anëtarësimit në BE për vendet kandidate. EPC duhet të jetë një hapësirë pune ku ne mund të takohemi dhe të bëjmë biznes, pavarësisht nëse jemi anëtar të BE-së apo jo.
Ne mezi presim takimin tonë të parë në qytetin e bukur të Pragës më 6 tetor. Dhe ne besojmë fuqimisht se ka një axhendë të rëndësishme dhe ambicioze për të diskutuar që në fillim.
Së pari, ne shohim potencial të madh për zgjerimin dhe integrimin e rrjeteve të energjisë dhe transportit të kontinentit tonë; dhe në EPC, ne mund të diskutojmë se si të punojmë drejt një sistemi energjie të ndërlidhur dhe neutral ndaj klimës në Evropë. Prioriteti i investimeve në prodhimin evropian të energjisë do të ndihmojë më tej për të siguruar pavarësinë e plotë nga eksportet ruse të energjisë, ndërkohë që të gjitha vendet evropiane, natyrisht, duhet të punojnë për të adresuar rritjen e çmimeve të energjisë në afat të shkurtër.
Në të njëjtën kohë, kriza klimatike mbetet një nga sfidat më të mëdha me të cilat përballemi – këtë mund ta shohim çdo ditë në të gjithë kontinentin tonë. Si të tillë, ne duhet të koordinohemi, duke përfshirë avancimin e ambicieve të shprehura në COP26 të Glasgout për financimin e përshtatjes klimatike të vendeve në zhvillim.
Një sfidë tjetër e madhe është siguria kibernetike. Të gjitha vendet tona përballen me kërcënime kibernetike dhe ne duhet të rrisim qëndrueshmërinë tonë kolektive kibernetike duke punuar së bashku për të siguruar institucionet dhe rrjetet tona.
Përtej këtyre sfidave, ne duhet të investojmë edhe në një agjendë pozitive për të ardhmen tonë të përbashkët.
Para së gjithash, kjo do të thotë të investojmë në rininë tonë. Prandaj, ne duhet të diskutojmë arsimin e lartë pan-evropian, aftësitë kërkimore dhe inovative, konkurrencën dhe qëndrueshmërinë — dhe këtë duhet ta bëjmë më shpejt se sa më vonë. Ne duhet të vazhdojmë të promovojmë shkëmbimet që përfshijnë të rinjtë dhe bashkëpunimin midis universiteteve dhe mund të përdorim EPC për të ndarë praktikat më të mira në këtë fushë.
Së fundi, ne duhet të diskutojmë gjithashtu se si të përmirësojmë tregtinë brenda-evropiane. Ne kemi nevojë për një kornizë të fortë për rritjen ekonomike dhe konvergjencën sociale për të gjitha pjesët e Evropës. Është thelbësore që ne të mbështesim iniciativat e bashkëpunimit ekonomik rajonal dhe nënrajonal dhe të investojmë në transportin rajonal dhe lidhjen tregtare.
EPC na ofron një mundësi kritike për t’u përballur me sfidat tona të përbashkëta. Evropa duhet të krijojë të ardhmen e saj dhe e vetmja mënyrë për ta bërë këtë është të punojmë së bashku si anëtarë demokratë të familjes evropiane. Puna së bashku na bën më të fortë, më të sigurt dhe më të begatë. Pra, në Pragë, le të krijojmë një forum që është gjithëpërfshirës dhe efektiv.
Ju mund të mbështeteni tek ne për të ndihmuar në arritjen e kësaj.
Edi Rama është kryeministër i Shqipërisë. Mark Rutte është kryeministër i Holandës.
Politico.eu
